Sonntag, 6. Januar 2008

Identitât e integrazion

Come che o ai contât intal post prin di chest, za fa cualchi dì o soi stât in Lussimburc, pe prime volte. No ai vût timp par viodi la citât e tant mancul il Paîs, ma o ai vût ben mût di confrontâmi un pôc cu la realtât de comunitât taliane (e, ancje se in plui piçule part, furlane). La ostarie di gno barbe e jere, come che o ai dit, un pont di incuintri par une gjenerazion - e salacor ancje di plui di une - di migrants talians. Cumò che no le gjestive plui gno barbe, le àn sô fie e l'om di jê, ancje lui talian, un gnûf migrant, in Lussimburc nome di uns vincj agns. O soi restât a viodi une comunitât ancjemò cussì unide: al funerâl a jerin plui di cent personis, e la plui part di lôr a jerin migrants, talians e furlans, che li di gno barbe si cjatavin e si cjatin par bevi alc, cjacarâ e zuiâ di cjartis. O soi restât ancje pe perfete integrazion di miei cusìns, che a son nassûts e cressûts in Lussimburc e però distès a àn dome la nazionalitât taliane. Lôr che no son mai stât, se no par feriis, in Italie, e ancjemò mancul in Friûl. O soi restât, parcè che a son integrâts in maniere parfete, ma distès si sintìn migrants. Di seconde gjenerazion, ma migrants. A presein, a amin il Lussimburc, a fevelin, dongje dal talian, ancje il francês, il lussimburghês e il todesc in maniere perfete, ma a disin di jessi migrants. O soi restât, ma daspò salacor o ai capît. Mi àn contât che la comunitât taliane e va simpri in mancul, che tancj a son za lâts vie, che a son soredut i fîs e i nevôts ancjemò li. Ma distès, la comunitât e conte ancjemò uns 50.000 personis (cussì mi àn dit), su uns 400.000 abitants dal Lussimburc. Un otâf de popolazion totâl. Une comunitât cussì grande che e a podût mantignî un sens identitari ancje intai fîs e intai nevôts. Ma che distès e je rivade a tacâ lis dôs robis: une integrazion perfete, e la mantignince dal leam cu la tiere di divignince.

2 Kommentare:

Unknown hat gesagt…

...E sa si conte chei âltris stranîrs portoghês e vie vie, a si rive scuâsi ae metât dai lusemburghês. Il Lussemburg, al é il paîs plui sior da l'Europe. Le prime vôlte ch'o soi lât a fâ speleologjie, al mi someâve cuâsi di sei in Friûl dome che le int aé un grum plui frêde.

Luche hat gesagt…

Mi plâs ce che tu marchis. Il Lussimburc al à scuasite la metât de popolazion di imigrants, e al è il paîs plui siôr di Europe. Mi plasarès savê cuale che e je la cause, e cuale la conseguence. O ai viodût inte realtât dai miei parincj però une integrazion une vore buine (dade ancje de capacitât di fevelâ in dutis lis lenghis e varietâts principâls dal Lussimburc), cence dismenteâ la sô divignince. E o crôt che chest al sedi fondamentâl pe convivence intal Paîs. Sul rest de int no pues dî, la me permanence là e je stade une vore curte...