Intratant che a Munic l'Oktoberfest e continue e che ancje il "fin setemane talian" al passe puartant miârs di visitadôrs (e salacor milions di francs tes sachetis dai ustîrs), in Baviere al sucêt chel che nissun al crodeve pussibil: daspò plui di cuarante agns (dal 1962!), la CSU e à pe prime volte pierdût la maiorance assolude intes elezions dal Land. 43,4% e son saltâts fûr ae fin, un risultât maraveôs par cualuncui altri partît, une disfate pe CSU, che tal 2003 e veve cjapât il 60,7%. Jo no vuei e no sai dî se di un pont di viste politic al è ben o mâl, salacor i cambiaments a son dispès positîfs, ma o viodarìn cemût che a laran lis robis. Ma ce che o ai pôre jo - e ce che a àn marcât in tancj - al è che cheste e podarès jessi la fin di une specialitât dute bavarese. La CSU difat no je une sezion regjonâl de CDU, ma un partît unic, "afiliât" ae CDU, ma autonim, cuntun so profîl e sôs ideis, che al rapresente in dut e pardut la Baviere. Un partît che al è presint no dome tal parlament di Munic, ma ancje a Berlin, li che al è partner fondamentâl inte Große Koalition, e cundiplui a Strasburc, intal parlament european. La fin de maiorance assolude e podarès volê dî la fin de presince autonome bavarese a nivel federâl e european: al partît i covente il 5% a nivel federâl par podê mandâ i propis rapresentânts, e viodût che in Baviere al è pete e dai il 10% de popolazion todescje, ae CSU i covente il 50% dai vôts bavarês par podê continuâ a jessi un partît che nol operi dome in sede regjonâl. Di sigûr, bavarês intai doi parlaments a saran simpri, ma salacor nome tant che rapresentants di sezions locâls di partîts federâi. Lis prossimis elezions europeanis e federâls a mostraran se e je rivade la fin de specialitât bavarese. E intratant l'Oktoberfest e continue...
Dienstag, 30. September 2008
Abonnieren
Kommentare zum Post (Atom)
11 Kommentare:
Grazie pe relazione.Mi piacerebbe capire se la "fine delle specialità" è un percorso obbligato o una neoplasia, un cancro. La globalizzazione è una fregature per la maggioranza di quanti vivono in solitudine o sono in qualche modo protetti, ma il mondo ormai vive su egoismi universali in cui le specialità(egoismi particolari)hanno la data di scadenza. Come incominciare a mangiare l'osso? Lì was denken ueber?
Chest o crôt che o podarìn viodilu - pe Baviere - dome di chi a cualchi timp, no pues dîlu. O crôt che al dipendarà tant di cemût che a laran lis elezions federâls e europeanis, parcè che no crôt che la int chi e vedi volût meti fin a la lôr specialitât, ma dome mostrâ il malcontent viers une politiche simpri plui vueide e lontane. Un procès che magari cussì no al à però scjadenât - di altris bandis - ancje la muart de specialitât. Chi magari cussì no la reflession politiche sui media no cjale a consecuencis gjenerâls e di largje puartade, ma si limite a comentâ il fat contigent, cence cirî di fâ ipotesis su lis sôs consecuencis. Si cirin i "colpevui", no capint che no son (dome) i responsabii dal partit a vê puartât a chest pont. Se i egoisims particolârs però a muraran cussì di corse o se invezit propite di reazion a si cimentaran simpri di plui no sai a dîlu. Intratant o cjalarai ce che al sucêt chi, e ce che al sucedarà ancje dongje (viôt Austrie, che si siere intune sô specialitât "nazionâl").
Boh, jo no ai propit capît nuie de domande di Marino, a partî de curiose definizion di "egoisim universâl": un fantastic ossimoro, come dî un "ugnul plurâl" (boh?).
No capìs nancje parcè che la specialitât e sarès un egoisim, strane associazions di ideis par un grant estimadôr di pre Toni che al à vût dit tal so testament spirituâl «O ai cirût di volêi ben ae mê tiere furlane, part dal mont, e servintle jê o ai intindût di servî il mont intîr»
Par vignî ae situazion di cui al fevele Luche, in Baviere e in Sudtirol i partîts etnics a son in dificoltât, in Catalogne e Scozie in incressite. A mi samein proces avonde normâi di entusiasim-delusion storiche, e a testemonein che la grande globalizazion e je avonde une bufule: plui che atri un proces economic, che a segonde dal lûc al provoche reazions diviersis.
Come che mi pâr al dîs ancje Luche, no fevelarès di "fin de specialitât": vino di jessi simpri apocalitics e fâsi strissinâ di ca e di là de emozion dal moment come i talians?
E se la CDU e torne ae majorance o disarìn: "La Baviere viars l'indipendence"?
Magari semplicementri, a vê simpri la maiorance a si son usâts mâl e a an coltât une classe dirigjent debule e pierdint: ancje chest al è avonde naturâl, dificilòn rivâ a mantignî simpri il podê in democrazie (par fortune, o zontarès).
Altri pont di discussion: par vê une specialitât covential par fuarce un partît etnic che al vedi la miorance asolude?
O disarès che se in Friûl al esistès un partît etnic nome cul 25% o saressin specialons: cjale ce che rive a fâ la Lega Nord in Italie cul 7%...
Dree, o soi d'acuardi cuasite dal dut cun te. Dome sul fat che la CSU (o fevelin di chê e no de CDU!!!) e sedi un partît etnic e che il pont al stedi li no pues dâti reson. La CSU no je assolutementri un partît etnic (e je un partît cristian-sociâl che nol à temis etnics, che chi in Gjermanie no funzionin), e je però un partît leât in maniere plui fonde di ducj chei altris ae storie e al teritori de Baviere (tal daspovuere), e al è un partît speciâl, parcè che al è un partît nome bavarês, ma che al à propis rapresentants in Europe, oltri che a Berlin. Rapresentants che no àn pôre di metisi cuintri la "sûr grande" CDU, cuant che cheste e fâs alc che al podarès no stâi ben ae Baviere. E o crôt che rapresentants "vêrs" (scusait la peraule stupide) dal Friûl (vêrs furlaniscj) intun lôr partît a Strasburc no i fasaressin mâl nancje al Friûl, par fâ un paralêl (e par cumò magari cussì no fantasience). E il pierdi cheste autonomie par me al volarès dî la fin da specialitât, la fin dal podê fâ sintî la propie vôs no come sezion regjonâl di un partît plui grant, ma come partît indipendent e cuntun so profîl. Un paragon cu la Leghe nol è (ancjemò?) tant proponibil, parcè che il "tipo Leghe" in Italie chi no je proponibil parcè che il sisteme politic e partitic al è pardabon une vore difarent. Ma tu âs tocjât intun ciert sens il pont: la Leghe e à il 7% in Italie (no in Lombardie o in Venit o tal Nord), la CSU cence il 50% in Baviere no varès nancje il 5% in Gjermanie, e sparirès de sene politiche nazionâl e europeane. La cuestion no je duncje tant su la maiorance assolude in sè chi intas elezions dal Land, ma sul fat che la une CSU sot dai 50% chi e piert la sô autonomie, si sfante, e ven mangjade de CDU - se e vûl continuâ a fâ politiche no dome chi in Baviere. E chest di sigûr al puartarès ancje ae pierdite di un toc di specialitât... sul fat che il cambiâ al sedi positîf (par furtune!) intune democrazie o sin d'acuardi, come che o sin d'acuardi sul fat che la CSU si jere masse usade a jessi al podê e si è "indurmidide" (su la classe di dirigjents no savarès, chei di cumò mi sa che in realtât a pain plui che altri par sieltis di chei che vignivin prin di lôr e che lôr no àn vût timp - e salacor snait - di cambiâ...). Ma che chest al puedi segnâ la fin di une cierte presince e autonomie de Baviere, o crôt che si puedi pensâlu...
Cjâr Dree, salacor dome un esempli banâl banâl e fantasientific par cirî di sclarîti un pôc ce che o intint. Fasìn che in Italie al sedi un partît furlan (lassìn ancje pierdi furlanist, parcè che come che o ai dit la CSU no à temis etnics o simii), un partît che al esist dome in Friûl, ma che a nivel nazionâl al à il 7% a la Cjamare (lu sai, ancje dome a nivel di conts in Friûl nol sarès pussibil, parcè che nancje un partît cul 100% dai vôts furlans nol rivarès al 5% a nivel nazionâl, ma metin che al puedi jessi) e il 7% al Senât (di sigûr mutatis mutandis, parcè che il Bundesrat todesc nol è paragonabil al Senât talian). Un partît che al è un dai tre de coalizion di guviêr (parcè che la Große Koalition no je dome jenfri CDU e SPD, come che tancj fûr di Gjermanie a crodin, ma jenfri CDU, SPD e CSU), un partît che al met siei ministris intal guviêr federâl. Un partît, come dit, che al esist dome in Friûl, e che al rapresente dome il Friûl. E che lu rapresente ancje in Europe. Pensistu che se al fos stât un partît cussì in Friûl e in Italie o varessin pierdût il Tocai, tant par dînt’ une chê e à scjaldât i cûrs dai Furlans? Come dit, no feveli di temis etnics, ma di sigûr di robis che a interessin la regjon di li che al ven chest partît. Ve' mo, la CSU e jere pa Baviere chest partît, un partît che e dave pês ae Baviere, che i dave specialitât intal panorame politic nazionâl todesc. Se e deventarà dome une sezion de CDU, dut chest nol sarà plui, al mancul che no si fasin dongje altris partîts (come i Freie Wähler, che a son ancje dome bavarês e che a àn vût un grant risultât, ma che cumò si considerin nome un moviment - e no un partît - e che no àn ambizions a nivel federâl) che a cjapin il so puest, e chest al podarès simpri jessi...
Luche, inanzidut pe presse o ai scrit partît etnic ma forsit al jere miôr dî teritoriâl. Par me a son tiermins che a coincidin: il partît teritoriâl al pense al destin di chel popul che al rapresente. Un partît "nome bavarês" par gno cont al è un partît etnic, che al sedi cristian sociâl, liberâl, comunist come ispirazion. Ma se o vin di confondisi, disìn partît teritoriâl.
Sigûr che se no an rapresentants tal parlament federâl a son plui debui, mi pâr une conclusion tipo chês dal comic talian Catalano: “se tu âs rapresentants tal parlament a puedin fevelâ, se no tu 'nd âs no puedin fevelâ..."
Ma di chi a fevelâ di "sparizion de specialitât" a 'nd cor... Chest o disevi. O marcavi la asurditât di cheste apocalittiche sentence.
Par cont dal Friûl, "a la Catalano" ancje il to esempli: se un partît furlan al ves ministros, al contarès une vore. Bè, sì, o disarès che tu mi âs convinçût, eh eh eh.
Par fâ un esempli mancul fantasientific ti pues fâ chel dal SVP: cun nancje l'1% e cul guvier stât che al jere simpri in bilic par vê la maiorance, ti inmagjinistu chel che al è rivât a puartâsi a cjase?
Par cont dal tocai: a jerin tantis lis protestis e lis mossis che si podevin fâ ancje cence vê parlamentârs variis che no tu 'nd âs nancje l'idee. Il probleme al è che i politics e lis associazions F-U-R-L-A-N-S no an fat un C-A-Z-Z-O: al inizi, vie indevant e ae fin de cuestion (viôt il non alternatîf sfigât "Friulano") parcè che o vin une classe dirigjent e inteletuâl locâl provinciâl, puare e cence dignitât.
Luche, no stìn a fâ masse svuâi di fantasie fantasientifics al 5% nazionâl: domandinsi cemût fâ il prin passut pe autocussience.
Cjâr Dree,
graziis de precisazions. Teritoriâl mi plâs di plui di etnic, mi fâs plasê che o vini cjatât une soluzion! ;-P Sigûr che si sarès podût fâ di plui pal tocai ancje cence un partît furlan al 5% nazionâl, se al ves stât fat alc; il pont al è che se lu vessin vût, nol sarès mai sucedût. Ma cheste e je, e lu ai dit, fantasience. E tu âs reson dal dut a dî che invezit di fevelâ di fantasience o vin di fâ esam di cossience e viodi di fâ ce che o podìn fâ ancje cence 5% nazionâi, ma cu lis nestris fuarcis. Ma chest nol jere l'argoment dal gno intervent, jo o fevelavi di Baviere, no di Friûl (tu sês tu stât il prin a tirâ fûr il Friûl, ma jo no fevelavi di Friûl in chest post). Lu ai citât dome in rispueste al to intervent, par cirî di fâ capî ce che o intint. E nol è che o pituri un senari apocalitic, no crôt che si scugni fevelâ di apocalisse, anzit, ma di sigûr e je la fin de specialitât politiche bavarese, su chest mi displâs no pues che insisti, e no crôt che tu tu puedis dineâlu (ma salacor o crôt che la difarence e stedi intal significât che o din ae peraule "specialitât", che il to mi somee difarent dal gno). E je la fin di une posizion privilegjade che la Baviere e à simpri vût inte storie todescje dal daspovuere e che cu la disparizion di un partît teritoriâl (che al sedi la CSU o cualuncui altri, di drete, çampe, centri, cristian o atei, nol impuarte) cussì fuart no varà plui. Parcè che un partît al 1% come la SVP chi in Baviere nol va in parlament, nol impuarte se in coalizion o no. Al stà a cjase (no crôt che al sedi il câs di visâti che il sisteme eletorâl todesc al è une vore difarent di chel talian - a tu puedis ancje sparagnâ la ironie sul ministri: la CSU e à vût dispès ministeris impuartants. E no crôt che al sedi nancje il câs di visâti che in Gjermanie no je une sdrume di ministeris come in Italie, e che no si fasìn sù ministeris ad hoc a ogni guviêr par parchegjâ aleâts eletorâi rompicoions. E no crôt che al sedi il câs nancje di visâti che intun sisteme federâl come chel todesc par un Land e je une robe une vore impuartante vê rapresentants ancje tal guviêr federâl - soredut se a son indipendents. O forsit che al coventi, viodût che mi somee che dai tiei posts no tu fasis grande difarence jenfri il sisteme talian e chel todesc?), e di cjase nol rive a fâ nuie, altri che puartâ alc...
O disarès che nol covente Luche: l'esempli dal Svp lu ai fat in rispueste di chel dal partît furlan al 5% in Italie e v.i., ma probabil o vin fat dut un messedot. Par cont dal sisteme todesc mi fidi completamentri dal to parê: vê ministris tal parlament federâl al è miôr pe Baviere che no vêju.
Il pont precîs dal discors al è chest, che difat tu lu ripetis: "di sigûr e je la fin de specialitât politiche bavarese, su chest mi displâs no pues che insisti,"
Jo o dîs: ise LA FIN o un stop e a lis prosimis elezions la CSU e torne a lâ su?
Se tu tu âs elements par dî che la CSU e je finide e duncje e je finide la specialitât de Baviere ok, ma se e fos la pussibilitât che a lis prossimis elezions o chês dopo a tornin su, la tô afermazion mi sa di "afermazion apocalittiche" (ancje piês: la fin e je LA FIN, tirmin definitîf e cence sperance. La fin). Dut achi: disimi tu...
Cjâr Dree, ben, cumò o capìs ce che tu intindis. No, no soi cussì apocalitic, o crôt di vê ancje scrit che "e podarès" jessi la fin, il pont di domande tal titul al veve ancje di jessi un segnâl che chest pal moment e je une considerazion che e lasse il timp che e cjate (par voltâ une mût di dî dal talian...). E o ai ancje scrit che o vin di spietâ lis elezions federâls e chês europeanis, par viodi se chest al jere un episodi o se invezite al è un trend. Al podarès jessi dut un fevelâ di bant, il gno, no lu sai, o cirivi di fâ une riflession su ce che al podarès sucedi, se chest trend al dure... un altri an o savarìn di plui! E come simpri mi somee che in fin dai conts o disìn il stes! :-) maman!
(from Com. 482)
Scuse par chest O.T.
Vinars ai 10 di Otubar, a 5 e mieze sot sere, alì dal auditorium dal gnûf palaç de Regjon a Udin (vie Sabbadini), la gnove version su cd dal GDBTF e ven presentade in maniere uficiâl. Ta chê ocasion, duncje, si podarà vê a gratis cheste seconde edizion dal cd che e à dentri uns 40 mil lemis (cun sinonims, fraseologjie, e v.i.) e che e rapresente, duncje, un imprest impuartanton par ducj chei che a doprin la lenghe furlane.
Nuie di scusâsi, o vevi intenzion di fâ un post su chel, ma zaromai tu mi sês vignût indenant! :-)
Kommentar veröffentlichen