Al è brut di lei ce che une des compagniis di avions plui di suces di chescj ultins agns in Gjermanie e je daûr a fâ cuintri il catalan. L'arogance dai beçs cuintri il dirit di viodi doprade la sô lenghe. Il parlament des Baleares al veve domandât a Air Berlin che a dopras il catalan sui siei svuei viers lis isulis. Al chel, il cjâf de compagnie, al à di vê rispuindût (cussì a disin i medias) che chest al è un campanilism di sorte come che al jere te Ete di Mieç. Un ex parlamentâr des isulis al à rispuindût ancjemò piês, zontant al logo de compagnie une svastiche e publicantlu sul so blog. Une mote orende e ofensive par ducj i todescs che cun chel passât no àn nuie ce fâ e che anzit a sconbatin parcè che chês ideis no tornin plui. Salacor al varès di sierâsi dut cussì, ma no, il president de compagnie di avions al va indenant, e al dîs che "al catalan si à di usâsi, che di sigûr no je une lenghe che sune come une lenghe di puartade mondiâl" (simpri stant a ce che a disin i medias). E chi al va masse, ma pardabon masse in là. No dome al dimostre di jessi un arogant ignorant, ma al ufint une comunitât lenghistiche, e cun chê dutis lis altris comunitâts di lenghis "piçulis", ancje me, come furlan. O cirarai di no cjoli mai plui un avion di Air Berlin, fin cuant che a tignaran un dirigjent cussì.
Sonntag, 8. Juni 2008
Abonnieren
Kommentare zum Post (Atom)
6 Kommentare:
O crôt che le domande dal catalan aé stade fate mâl e le rispueste aé vignude fûr ancjemó plui mâl.
Pecjât. Si viôt che i todescs a cjalin dome pai clients todescs ch'a van e ch'a tornin. Al varès podût conquistâ il cûr dai catalans ma si viôt ch'a nol a vidût chiste possibilitât. Spiete ch'o fasin une compagnie furlane e o nin in Catalonie. Ce ditu di Friûl Air ? Udin Air? Svualeblù ?
Jo o sarès par Furlanair:-)
Furlanair nol è migo mâl, no? :-) o crôt che al sedi lât dut mâl, al á tacât Air Berlin a dî che il catalan no lu metin, al à continuât piês l'ex parlamentâr catalan, il dirigjent di Air Berlin invezit di fâ une biele figure al à mostrât arogance e ignorance. Di chê altre bande al somee che al vedi di adevuâsi al nivel di chei todescs che a vadin inte Penisule Iberiche e che a àn fat di Mallorca il 17sim Land todesc, plen die Curry-Wurst-Buden e vie indenant. Une minorance di todescs, par sigûr, ma che magari cussì no e je une vore "visibil". Fasint dan a la Gjermanie stesse...
In efiets vie pal Istât, ma no dome, lis Baleârs a son pardabon tiere di invasion, soredut di bande dai todescs, ma no dome (inglês, francês, talians...).
Cu la biele stagjon la popolazion baleariche residente e devente une minorance demografiche, e di cheste popolazion residente si calcole che dome il 40% e à ducj i doi i gjenitôrs nassûts tes isulis, mancul dal 20% a àn ducj i nonos di li.
Cheste e je la situazion plui o mancul: in plui dai forescj de biele stagjon, e di chei che a van a stâ fis tes Baleârs, dispès pensionâts todescs o inglês che in gjenar no imparin ni catalan ni spagnûl e si contentin dal cjalt e dal mâr, e je ancje une migrazion fuarte di chês altris bandis dal stât spagnûl e cussì pardabon il catalan al finìs intune situazion pericolose.
No capìs ce fastidi che al puedi dâ meti une regjistrazion in plui par catalan: diviersis compagniis che a puartin a Barcelone lu fasin e no sai di nissun che al vedi protestât.
In ogni câs une brute polemiche.
Sì, al è come su la costiere turche o come che al podeve jessi une volte a Lignan. Ce che mi displâs al è che cheste int, come simpri, e je une minorance, rapresentative dome di une classe socio-culturâl, che e da une imagjine un pôc scalembre de societât todescje. Ce che o cjati però une vore plui grâf a son lis declarazion di chest manager di Air Berlin, che al ven a dî - parafrasant un pôc - che il catalan al è une lenghe di contadins e barbars. O tornìn indaûr di secui, o tornìn a concezions che si crodevin passadis, e salacor ancje a ideis che o speri no tornin a inlidrisâsi inte int... che l'ex parlamentâr des Balears al vedi sbalgjât dal dut inte sô rispueste o soi d'acuardi, ma chel lu à fat a so non, il manager di Air Berlin lu a fat di dirigjent di une aziende, e il pês des dôs robis no mi somee compagn...
e' bello trovar blog in friulano sul web, prima o poi anche nel mio ci sara qualche post nella lingua natia :)
Ben, o speri che tu lu fasis!
Kommentar veröffentlichen